Was das nu eechndlich bloß war,

Wonach mr in dr Juhchnd flidzde?

Mr wurde sälwr sich nich glar,

Was eechal ausdr Färne blidzde.

Schdäds indn Wolkn war dr Bligg,

Uff ännr Gullr rollde ‘s Gligg.

Un war mr schließlich nachgesausd,

Dann hield mr gar nischd in dr Fausd.

‘s war alles ähmd bloß Fandasie,

Das was mr suchde, fand mr nie.-

Allmählich ließ mr‘s Schebbsränn sin

Un gam so in de Jahre rin,

Wo mr Disdangs grichd zu dn Sachn.

Dann lärnd mr so ä innräs Lachn,

Das gribbld, wie ä aldr Wein,

In gansn Orgahnismus nein.

Mr guggd mid abgeglärdn Oochn

Uff die verriggdn Mänschheedswoogn

Un freid sich bloß noch geenichlich

Gans eenfach iewersch Dink an sich.

Quelle: Der gemütlich Sachse. 41/1925