Vugtlänner Ochsen sei bekannt

In' ganzen weiten deitschen Reich,

Doch wer kah sinst in' ganzen Land

Wos guts vun uns berichten gleich?

Scha Luther hot uns schlecht gemacht,

Und dös war doch ȧ grußer Mah!

Er hat uns ruh und ugeschlacht'

Gehissen; heit noch hängts uns ah.

Wenn ȧȧns ze uns in's Vugtland kimmt –

Gern net, ner wenns net annerscht gieht –

Der sieht gewieß siech vür und nimmt

Vursichtig sȧn'n Repulver miet.

Teufelskanzel.

's hȧȧßt, 's Vugtland, dös wär kalt und arm,

Und rauch, 's teet ze bedauern sei.

Und wer hie müßt, dös Gott derbarm!

Sött warme Hänschich stecken ei.

Wie Gott Sibirien gemacht,

Hätt er ȧ Stück dervah verlurn,

Und dodraus wär in grauser Nacht

Nu unner rauches Vugtland wurn.

Doch nimm amol dȧn'n Wannerstob,

Kumm her, beschau d'r'sch in der Näh!

Kumm ner, mach ost amol de Prob!

De wärscht dei blaues Wunner seh.

Schau über unnre Feller hie –

Reich, wie in' Niederland de Frucht!

Schau Wiesen, Wälder – frisch und grü,

Wie fei net übrol m'r sche sucht!

Schau unnre Gärten – s' is ȧ Staat,

Wie alles voller Obest hängt!

Wie Kuhl, wie Zwiefeln und Solat

Su schiene reiche Ȧrnten brängt!

Schau unnre Steedt und Steedtle ah –

Wie nei, wie sauber, wie adrett!

Aß ȧȧns se moln wuhl schänner kah!

Wu annerscht sei se schänner net.

Und schau de Dörfle – Eigebett'

In lustge grüne Büsch und Bȧȧm!

Kumm ner, de wärschts bereie net.

Wu annerscht sei se schänner kȧȧm.

Und schau de Leit – schau wie gewitzt

Ihr muntersch Reden! Schau ner, wie

Der Schalk aus lusting Ȧȧngen blitzt!

Und wie se emsig, omst und früh!

Und ihre Sprooch – wuhl hart und dȧrb,

Doch voller Schiehȧȧt, voller Kraft,

Ganz wie de Leit: vun außen hȧrb,

Doch gut der Kȧrn, voll Kraft und Saft.

Se brenne kȧȧne Butter nah,

's werd nix verblümmelt. Wos se soong,

Is ober wahr, und sicher kah

Jeds Wort als Wahret hȧm m'r troong.

Und schau de Mȧȧdle – frisch und rund!

Und is d'r'sch üm ȧ Frȧȧ ze ta,

An Seel und Körper kȧrngesund,

Triffst du se nerngst net besser ah.

Und unnre Schänken – gieh ner nei!

Dös is ȧ Bier, dös do m'r trinkt!

Und wie de Leit su heauf sei!

Wie mannig lustigs Lied m'r singt!

Und unnre Grügenifften gar

Und unner fetter Bambes – wer

Se nahntig 'gessen hot, fürwahr

Der kah miech orntlich dauern ner.

Mei Vugtland, es is schie und reich,

Is, wenn es ȧȧ geschändt werd ner,

Ȧ Patterle in' deitschen Reich;

Und wer'sch net glȧbbt, der kumm ner her!

Bildnachweis

Kopfbild: Wappen der Vögte von Weida (Weida, Gera und Plauen)

              Wikipedia gemeinfrei

Bild im Text: Teufelskanzel im Naturschutzgebiet Elsterhang bei Röttis. Vogtlandkreis, Sachsen.

Urheber: Kora27