‘s is do haußen gepassiert af enn Dorf. Ich hob‘s salber miet derlabbt. Do gieh ich zer Fostnacht gegn Ohmd in dr Duster de Stroß ie. Af äämol här ich e Geschrei, Zetermord un e Gekreisch. Un wie‘s wätter rahkimmt, do verstieh ich‘s: „Halt ne auf!“ - und do saust e baamlanger Dingkert af mir zu. Ich denk, ‘s is e Spitzbub odder e Märder, un ich rammel ne entgegn. Ober dar Hollunk schlenkert mich af de Seit. ‘s hot bluß noch e Haar fefahlt, do hett ich de Stroß gemessen, wu dr Matsch an allertieffsten war.

Itze kame de Verfolger drhinterhaargebattaligt, vererscht mei Freind, dr Balwier.

„Lui“, rief ich, „halt ah! Dan krist de net! Wos fer e schlachter Spion war‘sch denn?“

„Ach, Gevatter“, sogt‘r, „denk dr‘sch näar! Kimmt dar fremme Karl mit enn Kastel itze in dr Dammering nei mein Balwierloden und frogt, ob ich kääne Balwierpinsel kaaf. ‘r hett sehr wääche, ober sehr dauerhafte. Dodrbei hult‘r mr‘sch Kastel hie. Iech tu enn harzhaften Griff, schrei ober gerod naus, weil ich nei in viel scharfe Spitzen gefahrn bie. - do laßt dar Karl ‘s ganze Kastel falln, schreit ‚Fostnacht‘ und zieht fix de Leine. Iech zünd wie dr Blitz e Streichholz ah; und wos sah ich? Denk dich när nei die Affärie: enn labandign Igel. He, als Balwierpinsel! Su ein Schweinigel!“

„Waar?“ „Nu, dar Karl! - Un wenn ich den derwischt hett! Do hett‘s ober geknallt!“

„Bei wan?“

„Nu, du willst mich wuhl aah verhohnebiebeln? Be mir doch net!“ „Na, na! Sei fruh, dass de ne net drwischt host!“

Bildnachweis

Faschingsumzug Battaune 2013. Foto: Wolfgang Brekle